‘စစ်ဆင်ရေး ၁၀၂၇’ နောက်ပိုင်း ချင်းပြည်နယ်အတွင်း တိုက်ပွဲပေါင်း ၂၈ ကြိမ်ထက်မနည်း ဖြစ်ပွားခဲ့ပြီး ဒေသခံကာကွယ်ရေးပူးပေါင်းတပ်များက မြို့ ခုနစ်မြို့ထက်မနည်းကို သိမ်းထားနိုင်ခဲ့သည်။ စစ်ကိုင်းတိုင်းအတွင်းတွင်လည်း တိုက်ပွဲပေါင်း ၁၁၉ ကြိမ်ထက်မနည်း ဖြစ်ပွားခဲ့ပြီး ဒေသခံကာကွယ်ရေးပူးပေါင်းတပ်များက မြို့သုံးမြို့ကို သိမ်းယူနိုင်ခဲ့သည်။

‘စစ်ဆင်ရေး ၁၀၂၇’ စတင်ပြီးနောက််ပိုင်း ရခိုင်ပြည်နယ်တွင်လည်းတိုက်ပွဲများ ပြန်ဖြစ်ခဲ့ပြီး စစ်ကောင်စီတပ်စခန်းပေါင်း ၄၆ ခုထက်မနည်းကို ရက္ခိုင့်တပ်တော်(AA)က သိမ်းယူခဲ့သည်။ ထိုအထဲမှ စခန်း ၄၀ နီးပါးသည် စစ်ကောင်စီက စွန့်ခွာသွားသဖြင့် အလွယ်တကူ သိမ်းယူနိုင်ခဲ့ခြင်းဖြစ်သည်။

၂၀၂၃ ခုနှစ် အောက်တိုဘာ ၂၇ ရက်တွင် မြောက်ပိုင်း ညီနောင်မဟာမိတ်သုံးဖွဲ့နှင့် ပူးပေါင်းတပ်များက ‘စစ်ဆင်ရေး ၁၀၂၇’ကို စတင်ခဲ့ပြီး ချင်း‌ရွှေဟော်အပါအ၀င် တရုတ်-မြန်မာနယ်စပ်ရှိ မြို့လေးမြို့နှင့် သိန္နီမြို့ကို ထိန်းချုပ်ထားနိုင်ခဲ့သည်။ ထို့အပြင် ချင်းရွှေ‌ဟော်၊ မုန်းကိုး၊ ပန်ဆိုင်းနှင့် ကျင်စန်းကျော့ရှိ နယ်စပ်ဂိတ်လေးခုကိုလည်း သိမ်းပိုက်ထားသည်။

ကရင်နီဒေသ၊ ချင်းပြည်နယ်နှင့် တနင်္သာရီတိုင်းတို့ရှိ မြို့နယ်အားလုံးတွင် လက်နက်ကိုင်ပဋိပက္ခများဖြစ်ပွားခဲ့ပြီး စစ်ကိုင်းတိုင်းတွင် မြို့နယ် ၃၇ ခု ရှိသည့်အနက် ၃၄ ခုတွင်လည်းကောင်း၊ မန္တလေးတိုင်းတွင် မြို့နယ် ၂၈ ခုရှိသည့်အနက် ၂၅ ခုတွင်လည်းကောင်း တိုက်ပွဲများ ဖြစ်ပွားခဲ့သည်။

နိုင်ငံအနှံ့ မြို့နယ်စုစုပေါင်း၏ ၆၇ ရာခိုင်နှုန်း၌ တိုက်ပွဲများဖြစ်ပွား

‘စစ်ဆင်ရေး ၁၀၂၇’ နောက်ပိုင်း တိုက်ပွဲများ ကျယ်ပြန့်သက်ရောက်လာမှု

အာဏာသိမ်းမှုအလွန် နှစ်နှစ်ခွဲကျော်ကာလအတွင်း နိုင်ငံအနှံ့ မြို့နယ်ပေါင်း ၂၂၁ ခုထက်မနည်း (မြို့နယ်စုစုပေါင်း၏ ၆၇ ရာခိုင်နှုန်း)၌ လက်နက်ကိုင်တိုက်ပွဲပေါင်း ၁၂,၂၂၅ ကြိမ်ထက်မနည်း ဖြစ်ပွားခဲ့သည်။ ၂၀၂၁ ခုနှစ် ဖေဖော်ဝါရီလမှ ဒီဇင်ဘာလအတွင်း နိုင်ငံအနှံ့ မြို့နယ်ပေါင်း ၁၁၀ ထက်မနည်းတွင် လက်နက်ကိုင်တိုက်ပွဲများ ဖြစ်ပွားခဲ့ပြီး ၂၀၂၂ ခုနှစ်တွင် မြို့နယ် ၇၇ ခု၊ ၂၀၂၃ ခုနှစ်တွင် ‘စစ်ဆင်ရေး ၁၀၂၇’စတင်ပြီးနောက် (နိုဝင်ဘာလအထိ) မြို့နယ် ၃၄ ခု၊ စုစုပေါင်း ၁၁၁ မြို့နယ် ထပ်တိုးလာခဲ့သည်။ အောက်ဖော်ပြပါ မြေပုံသုံးခုတွင် အာဏာသိမ်းမှုအလွန် လက်နက်ကိုင်တိုက်ပွဲများ ကျယ်ပြန့်လာသည်ကို နှစ်အလိုက် ပိုင်းခြားဖော်ပြထားပါသည်။

ညီနောင်မဟာမိတ်သုံးဖွဲ့နှင့် ပူးပေါင်းတပ်များ၏ ‘စစ်ဆင်ရေး ၁၀၂၇’ နောက်ပိုင်း နိုင်ငံအနှံ့ တိုက်ပွဲများ ကျယ်ပြန့်သက်ရောက်လာမှုအခြေအနေကို နှိုင်းယှဉ်ဖော်ပြထားခြင်းဖြစ်ပါသည်။ အာဏာသိမ်းမှုအလွန် နှစ်နှစ်ခွဲကျော်ကာလအတွင်း နိုင်ငံအနှံ့ မြို့နယ် ၂၂၁ ခုထက်မနည်းတွင် လက်နက်ကိုင်တိုက်ပွဲပေါင်း ၁၂,၂၂၅ ကြိမ်ထက်မနည်း ဖြစ်ခဲ့သည်။ ‘စစ်ဆင်ရေး ၁၀၂၇’ တလတာနီးပါးကာလအတွင်း ရှမ်းပြည်နယ်မြောက်ပိုင်းအပြင် စစ်ကိုင်းတိုင်း၊ ရခိုင်ပြည်နယ်၊ ချင်းပြည်နယ်၊ ကရင်ပြည်နယ်နှင့် ကရင်နီဒေသတို့တွင် တိုက်ပွဲပေါင်း ၅၂၅ ကြိမ်ထက်မနည်းဖြစ်ခဲ့သည်။

‘စစ်ဆင်ရေး ၁၀၂၇’ ဆက်စပ်အခြေအနေ

၂၀၂၃ ခုနှစ် အောက်တိုဘာ ၂၇ ရက်တွင် မြောက်ပိုင်းညီနောင်မဟာမိတ်သုံးဖွဲ့က ‘စစ်ဆင်ရေး ၁၀၂၇’ကို ဆင်နွှဲခဲ့ပြီး ချင်းရွှေဟော်မြို့အပါအဝင် တရုတ်-မြန်မာ နယ်စပ်ရှိ မြို့လေးမြို့နှင့် သိန္နီမြို့ကို ထိန်းချုပ်နိုင်ခဲ့သည်။

စစ်ကောင်စီနှင့် TNLA အကြား တကျော့ပြန်စစ်ပွဲနှင့်ဆက်စပ်အခြေအနေ

၂၀၂၃ ခုနှစ် ဇူလိုင်လမှ အောက်တိုဘာ ၂၄ ရက်အထိ ရှမ်းပြည်နယ်မြောက်ပိုင်းအတွင်း တအန်းအမျိုးသား လွတ်မြောက်ရေးတပ်မတော် (TNLA) နှင့် စစ်ကောင်စီတို့အကြား လက်နက်ကိုင်ပဋိပက္ခများ တကျော့ပြန် ဖြစ်ပွားပြီး ပြင်းထန်ခဲ့သည်။